Sanaysay sa Tula

Alejandro G. Abadilla

Iisa ang kanilang daigdig:

Ang daigdig ng mga kaluluwa.

Iisa ang kanilang kaharian:

Ang kaharian ng kagandahang mulala at

      walang malay

Sa kanilang sarili-

Sila na mga matang may pananaw sa dilim,

Sa karimlang mahiwaga,

Sa rurok-lalim ng karimlan.

Iisa ang kanilang kaharian:

Ang kaharian ng kagandahang mulala at walang maliw-

Ang kapangyarihan ng Bathalang nasa tao.

Ang tula ay sining:

Ang katauhang nagbalik sa dati niyang sarili:

Sa sarili niyang dumarama lamang,

Sa sarili niyang nagmamatuwid,

Sa sarili niyang daigdig ng karurukan,

Sa kaharian ng Bathala.

(1955)

Mga Tula (Pilipino) | Poems (English)